Осветен крстот на црквата во изградба посветена на „Св Великомаченик Ѓорѓи“ во Селемли (Фото)

Со благослов од неговото високопреосвештенство, Митрополитот Повардарски г. Агатангел, во селото Селемли, Богданци беше извршен свечен чин на осветување и поставување на Крстот на кровот од новата црква која се гради во чест на Светиот Великомаченик Ѓорѓи. Овој значаен духовен момент претставува симболично и суштинско приближување до исполнувањето на една длабока и долготрајна желба на православните верници од ова гевгелиско село – изградба на сопствен храм посветен на Бога.

Свеченоста се одржа во присуство на бројни верници, локални жители и гости, кои заедно со духовниот пастир го споделија овој радосен миг. Поставувањето на Крстот врз храмот, како кулминација на еден важен градежен сегмент, беше дочекано со трепет, молитва и благодарност.

Проектот за изградба на црквата е резултат на заеднички напор, љубов и вера на мештаните од Селемли, кои и покрај бројните пречки и предизвици, не се откажаа од намерата да изградат духовен дом. Овој храм, кој сè уште е во фаза на изградба, веќе се претвора во симбол на заедништво, надеж и непоколеблива вера.

Фото: Гевгелиско Архиерејско Намесништво