Манастирот „Свети Ѓорѓи“ кај Неготино – дом на 25 чешми за 25 болести

Во срцето на Тиквешијата, над реката Вардар, на само стотина метри височина од водата, се издигнува манастирот „Свети Ѓорѓи“ – духовно прибежиште и лековито светилиште кое сè повеќе привлекува верници и посетители од сите страни.

Она што овој манастир го прави уникатен се дваесет и петте чешми, вградени во неговиот простор, секоја со свое име и своја посебна намена. Според локалното верување и предание, секој извор лечи различна болест – од телесни болки до душевни маки. Луѓето со надеж, молитва и вера пристапуваат до чешмите, барајќи олеснување, исцелување или духовен мир.

Манастирот е лесно достапен, сместен веднаш до автопатот и железничката линија Скопје–Солун. Расположен на тераса над Вардар, со бујна вегетација и изобилство вода, тој претставува вистински контраст на сувите ридови од другата страна на реката. Погледот од манастирот се протега кон целото поле – од селото Пепелиште па сè до планината Серта, нудејќи не само духовна, туку и природна убавина која смирува.

Манастирот „Св. Ѓорѓи“ не е само место за молитва, туку жив симбол на народната вера, преданието и надежта, кои живеат во секој млаз вода што извира од неговите свети чешми.

Фото: Slavica Jovanovska