Откриени остатоци од родниот град на Евридика – бабата на Александар Македонски (Фото)

Недалеку од битолското село Црнобуки, археолозите открија фасцинантни остатоци што укажуваат на постоење на антички град чија локација долго време била изгубена за историјата.

Новооткриените артефакти, според првичните анализи, датираат од времето на Александар Македонски, а некои експерти дури сметаат дека населбата можеби била активна уште во бронзеното доба – помеѓу 3.300 и 1.200 година пред нашата ера.

Се верува дека градот можеби е токму легендарната престолнина Линкус – митското родно место на кралицата Евридика I, баба на Александар Велики. Ако оваа претпоставка се потврди, ќе се работи за едно од најзначајните археолошки откритија на Балканот во последните децении.

До неодамна, локалитетот познат како Градиште се сметаше за воена тврдина од 3 век п.н.е., изградена за време на владеењето на македонскиот крал Филип V. Меѓутоа, најновите истражувања, реализирани од заеднички тим составен од стручњаци на НУ Завод и музеј – Битола и Државниот политехнички универзитет во Калифорнија (Кал Поли Хумболт), го отворија прашањето за многу подлабока и покомплексна историја на оваа територија.

Професорот по антропологија и археолог Ник Ангелоф од Кал Поли Хумболт смета дека откритието можеби ја открива токму престолнината на некогашното кралство Линкус – политички и културен центар од исклучително значење.

„Станува збор за исклучителна археолошка сензација – нешто што се случува еднаш во кариера. Локацијата на градот, сместена долж важни трговски правци кои воделе кон Константинопол, укажува на клучна улога во древните мрежи на моќ, економија и култура“, изјави професорот Ангелоф.

Целата објава може да се прочита ТУКА.

Фото: Photos courtesy of Cal Poly Humboldt’s Cultural Resources Facility