Македонското јајце најквалитетно во светот – Наша Фарма

Вгнездени среде невознемирените предели на Скопје, каде што воздухот шепоти приказни за чистота, а почвата лулка ветување за неизвалкан раст, семејството Василевски пред осум години го засади семето на „Наша фарма“. Она што започна како семејна потрага по здрава храна сега се разви во процут наследство на органско изобилство.

Во овој ексклузивен дијалог со визионерската сила зад „Наша фарма“, Жарко Василевски, ја разоткриваме хрониката на една земјоделска одисеја – приказна не само за просперитетниот бизнис, туку, уште поважно, за непоколебливата посветеност на негување на живот исполнет со здравје и одржливост. А исто така во ова интервју откриваме и зошто македонските јајца стојат како олицетворение на извонредноста на глобалната сцена.

1. „Наша фарма“ потекнува од желбата на семејството Василевски за здрава храна. Како оваа лична потрага еволуираше во просперитетен семеен бизнис?

– „Наша фарма“ е создадена пред осум години како семејна традиционална фарма, и тоа за потребите на моето семејство од здрава и органска храна. Таа идеја се роди да направам свој ранч, односно своја фарма, која што ќе произведува тоа што може. Дел од храната да биде произведена без хемикалии, хормони и слично. Јајцата произлегоа како производ кој најмногу се бара и најдобар производ за раст и развој на децата, како и на секој човек. Кокошките беа лесни за чување и истите ги добивме како подарок од еден роднина. Почнавме да ги чуваме, а по неколку месеци се размножија и направивме поголемо јато, а со тоа се зголеми и бројот на јајца, кои најпрво ги подарував на роднини, пријатели и посетители на фармата, но тој раст продолжи и понатаму. Кокошките ги чувавме и ги размножувавме, сè до момент кога решив да ги понудам јајцата на социјалните мрежи. На Фејсбук направив страна која ја нареков „Наша Фарма“ и ги понудив јајцата. Од тогаш се случи ефект на снежна топка, т.е. почна да има нарачки и тие да растат од недела во недела. Луѓето беа задоволни и тоа беше знак за мене дека треба да ја проширам фармата. Набрзо купив уште еден плац во мојата околина и фармата се прошири на поголем простор. Ефектот на социјалните мрежи растеше од година во година сè до сега кога броиме неколку стотини кокошки (околу 300), но сите се чувани здраво во природна средина, каде што се пуштени во природа и уживаат на свеж воздух и во здрава храна, без примеси на хормони и концентрати кои ги има во индустриското производство. Токму тоа е идејата на „Наша фарма“. Во меѓувреме вклучивме и одгледување на пчели, па продававме и производи од козјо млеко. „Наша фарма“ за кратко време стана синоним за сигурен производител и сигурен доставувач на здрава органска храна. Задоволни сме и ние и тие што купуваат од нас.

2. Како вклучувањето на различни видови птици придонесува за успехот на фармата?

– Најпрво почнавме со обични кокошки, а потоа вклучивме и дукатки (бисерки). Во фармата имаме и неколку украсни фазани и пауни, а имавме и патки кои ги дислоциравме на друго место. Јајцето како најбаран производ, кој е полн со минерали, витамини и протеини, е храна која е неопходна во човечкиот живот, и тоа посебно во семејствата со мали деца кои најчесто бараат ваква храна. Ние со тоа што донесовме нови животни влијаевме на биодиверзитетот на нашата фарма, а воедно понудивме и друг вид на јајца кои претходно биле застапени во македонското традиционално мени, но бидејќи не се чуваат, едноставно полека „исчезнале“. Во Македонија во моментов немаме големи фарми на дукатки, патки и друго. „Наша Фарма“ повторно ги запозна луѓето, кои не пробале такви јајца, да ги вкусат. Во други земји има фарми со илјадници патки, но кај нас такво нешто не постои, но затоа ние го враќаме и тој дел, односно да се вкуси и таква храна каква што не е достапна во маркетите и пазарите.

3. Жарко ја споменува љубовта на неговото семејство кон животните. Раскажете ни еден обичен ден во фармата со вашето семејство?

Фармата се наоѓа во Ново Село пред Волково, во општина Ѓорче Петров, во релативно чиста и зелена околина. Тој простор го избравме затоа што нема индустрија и големи загадувачи. Во минатото овие парцели земја биле бавчи на нашите дедовци и прадедовци а сега  голем дел од нив беа напуштени и необработувани. Со идејата за „Наша Фарма“ се случи еден вид на облагодарување на дел од просторот со што и дадовме пример на другите кои сакаат да имаат фарма или ранч дека можат да се занимаваат со ова, а притоа да прават и профит, но и да си го зачуваат просторот кој како земјоделска површина бил запуштен или не гледале перспектива во него. Деновите кои ги поминуваме на фармата се различни. Во текот на викендите сме постојано во тој плац со животните. Утринско хранење, промена на свежа вода, собирање на јајцата во попладневните часови се најубавите работи. Пиењето кафе и едноставно живеењето со биодиверзитет, со животни кои што во благодет живеат околу вас е прекрасен. Во работните денови стануваме рано затоа што фармата треба да се отвори бидејќи кокошките спијат затворени. Тие сами влегуваат внатре во определниот простор за да спијат, каде што навечер ги затвораме, а потоа наутро ги пуштаме и проверуваме дали има некаков проблем. Доколку нема, тогаш ги полниме хранилките и продолжуваме на работа. Кога ќе се вратиме од работа, тие веќе легнуваат сами, ги собираме јајцата, ги селектираме и чистиме и правиме план за достава следниот ден. Во зимските месеци сè е забавено, затоа што носивоста е помала, но и тоа е дел од животот на фарма.

4. „Секогаш испорачувајте го она што им го ветувате на клиентите“, е клучен принцип. Како оваа посветеност ја обликуваше репутацијата на фармата?

– Тоа наше мото нè изгради до еден мал бренд за производство на домашни јајца. Во државава, но и на Балканот се случува да нарачаме производ и да добиеме нешто сосема различно. Ние тргнавме од тоа мото дека тоа што сме се договориле, тоа ќе го испорачаме во точно договорено време и место. Затоа „Наша Фарма“ произведува и ги носи производите до купувачите, нема никакви посредници меѓу нас и купувачот. Луѓето сега немаат време да шетаат по маркети и да трошат време за да бараат различни производи и намирници. Многу е полесно кога вие ќе им ги сервирате производите до дома и тие да бидат со врвен квалитет. Кај нас во фармата нема застој, сите јајца се порачани дури десетина дена однапред. Производството е мало, но специфично, еколошко и секогаш навремено доставено. Без ваков принцип тешко дека некој во иднина ќе работи подолго време.

5. „Наша фарма“ стигна до клиенти во Дубаи. Кои фактори придонесуваат за глобалната привлечност на вашите органски производи?

– За чудо најпрво странците нè наоѓаат. Најверојатно странците кои живеат во Македонија многу подобро пребаруваат на интернет тоа што им треба, додека нашите домашни граѓани почесто одат на пазар. Имавме дури и гости од Дубаи, кои прочитале за „Наша Фарма“ и дојдоа на фармата, беа воодушевени од природата. За нив сè што е модерно и луксузно веќе беше видено… од луксузни хотели, јахти и останато, но сакаа нивните деца да згазнат на почва, на земја, да трчаат по трева, да допрат живо пиле, да скинат јаболки, а потоа да скршат јајце, да го зготват и да го изедат.  За нив тоа беше фантастично, незаборавен момент, ја допреа природата во нејзината срж а за нас тоа е обично секојдневние. Дали сме свесни што поседуваме како држава ?  Верувајте, кој сака да работи, Македонија нуди многу, но треба да се работи и да се биде фер во тој однос плус да се биде истраен. Ниту една победа не доаѓа преку ноќ, туку треба да се работи на неа, да бидеш подобар и попрецизен од секој ден, миг претходно, за да бидеш поуспешен во текот на годините, тоа е целта. Еволуцијата на системите и единките не смее да запре!

6. Освен производство на јајца, со што друго може да се пофали вашата фирма?

– Самите клиенти ни бараа тоа што им е потребно. На пример им недостигаше квалитетно сирење и квалитетен мед. Во соработка со наши пријатели изградивме  партнерски однос, земавме сандаци со пчели кои ги чуваме во близина на Скопје, тој мед исто така го пласираме преку „Наша фарма“. Дел од козите кои се чуваат во околината на Волково и Кучково се исто така на располагање за млеко, сирење и урда кога тоа е потребно. Таму ангажиравме наш пријател кој се грижи за нив. Дел од производите ги пласираме преку „Наша фарма“ и тоа се сезонски производи кои брзо се трошат. Ние сме мала фарма, но сме показател како треба да се работи за да бидете успешни. Секој кој сака може да работи што сака, многу посериозно од нас, од производство на козјо млеко и сирење, производство на мед и јајца, па дури тоа може и да му биде главна дејност.

7. Раскажете ни за некој интересен настан или случка што ви се има случено во фармата?

– Еден од поубавите настани е кога во текот на минатото лето една од кокошките сама, тајно, си направила гнездо и нè изненади кога наеднаш се појави со 15-16 пилиња. Тоа беше прекрасно изненадување кое ни кажува дека природата си го наоѓа својот пат за да еволуира и да се прошири без интервенција од човекот.  Инаку, секоја сабота и недела доаѓаат пријатели со нивните деца и секогаш има нешто ново и интересно.

8. Дали во Македонија може да се живее од овој бизнис?

– Може да се живее од овој бизнис во Македонија, но сето ова треба да се мултиплицира во поголема фарма и во посериозно производство и посериозен и попрофесионален пласман на производите. Ова е мала фарма како показател за некој што сака да се занимава со нешто поголемо, ние сме тука да дадеме некој совет и поддршка. Многупати ни се јавувале луѓе за да направат слична фарма, а ние секогаш сме давале информации како треба да се работи. Секој што сака може да живее од ова, но треба чесна работа, истрајност, многу труд, знаење, но и постојано учење. Тие се основните принципи за успех.

9. Во светскиот ранг на квалитет каде стојат според вас македонските јајца?

– Можеби нема истражување кое официјално покажува кои јајца во светот се најквалитетни но со сигурност можеме да кажеме дека оние произведени на тлото на Македонија се во врвот на тој ранг. Ќе се прашате: Зошто? Одговорот е едноставен. Па само погледнете со какви предели располагаме како држава. Колку убава плодна почва имаме, колку реки, езера, потоци… колку сончеви зраци во текот на годината… Видете само колку многу растенија растат без да се трудите околу нив. Едноставно самите се сеат, растат, цветаат. Илјадници врсти, раси, сорти од жив свет „експлодира“ на нашата територија, едноставно сам од условите и дарежливоста на природата. Токму ова говори дека и јајцето, млекото, сирењето, месото, овошјето и зеленчукот се во врвот на светската мапа за квалитетна храна. Само треба да бидеме свесни да ставиме Стоп за она што се вели тотална индустријализација и неповратно загадување на се што е исконско дадено чисто, едноставно убаво и природно функционално. Да, јајцата од Македонија се најздрави, највкусни и посебни како и се друго што е родено и одгледано со добра намера на овие простори.

10. Раскажете ни за плановите на фармата во иднина, вклучувајќи ги и очекувањата за странски инвестиции. Како го замислувате растот на бизнисот?

– Во иднина фармата ќе расте до извесно време, колку што дозволува просторот. Ако сакам да се проширам како ранч, ќе треба да се купи и нов простор. Досега се направени и неколку инвестиции, како проширување на фарма, а сега ново е тоа што градиме нов објект кој ќе биде за посета на сите кои сакаат да дојдат и да си купат јајца, да останат тука, па дури и да преспијат и да бидат фармери на неколку дена. Да ги воведеме во фармерскиот живот, да се чувствуваат убаво и да се поврзат со природата. Сакам да испратам порака дека луѓето треба да се поврзат повторно со природата бидејќи во изминатите децении премногу се оддалечија од природата и станаа механички суштества, кои се исполнети со брзање, гнев, стрес и се бомбардирани од негативни информации. Живеењето на фарма и поврзувањето со природата е тоа заземјување кое му недостига на човекот, и тоа посебно на урбаниот човек, на скопјани на пример, и на сите тие кои живеат во поголемите градови низ целиот свет. Без поврзување со природата и без тој баланс што мора да го имаме, ние може да бидеме само сè повеќе тажни, несреќни, изгубени, дефокусирани…

11. Совет до сите млади кои сакаат да започнат еден ваков бизнис во Македoнија.

– Совет до сите кои сакаат да се занимаваат со ваков бизнис е прво да не го гледаат профитот, туку да ја гледаат работата. Ако имаат желба и визија после долги години, тогаш нека се фатат и нека работат. Доколку гледаат само да заработат од ваков бизнис, тогаш воопшто нека не почнуваат затоа што ќе бидат изненадени од многу предизвици кои ќе ги дефокусираат и демотивираат. Многу фарми се отворија, но и се затворија. Некои опстанаа, но успешноста и опстојувањето зависат многу од тој што ја води идејата, колку е упорен и искрен во намерите. Не секогаш профитот и парите се главен двигател на одредена идеја. Ова би го споредил со едно уметничко дело.  Дали ако некој ви каже, ви порача, да нацртате врвно уметничко дело и за тоа ви даде на пример милион евра… дали тоа со гаранција ќе бидне уметничко дел?  Можеби да, можеби не… Но доколку нешто работите со многу љубов, знаење, внимание, посветеност, и тоа е плус оригинално, убаво, полезно, фасцинантно, автентично и сл. е тогаш можеби веќе имате изработено уметничко дело и тоа можеби ќе вреди многу… Така е и со работата, бизнисот, професијата … ако само парите ви се мотив да дејствувате, т.е. правите нешто, тогаш голема е веројатноста да не успеете и да бидете разочарани. Уметноста на живеењето и работата ја водат други пориви а не парите и профитот. Внимавајте на тоа оти ова е посебно важно кога е во прашање природата генерално.
Да имате фарма е еден вид уметност, секој ден треба по една нишка, по една боја да додавате за да го изградите цртежот за на крај тој да биде перфектен. Бидејќи се работи за храна на крајот тоа што ќе го изработите ќе влијае врз здравјето на вашите купувачи но и на вашето семејство, како и на  околината и сите кои партиципираат во и околу фармата. Замислете да имаме 50-60 села со органски фарми од различен домен, колку тоа би било блескаво во нашите очи и во очите на светот. Колку луѓе ќе сакаат да дојдат да ги видат тие села со органски фарми за создавање на јајца, мед, млеко, сирење и било кој друг производ, но за жал кај нас не се гледа на тоа како на предизвик и можност за раст и развој. Имаме доволно вода, почва, сонце во изобилие, но секој гледа да ја заобиколи работата и за пократко време да направи повеќе пари. Тоа е грешката од која се трга подолго време кај нас и поради тоа немаме успех во многу бизниси. Прво треба да се пронајдеме себеси во работата што сакаме да ја работиме, а потоа таа ќе си го донесе плодот.

Додека сонцето заоѓа над „Наша фарма“, фрлајќи златен сјај на пејзажот што педантно го негува семејството Василевски, визионерите на чело, предводени од Жарко, го фрлаат погледот кон хоризонтот што постојано се проширува. Надвор од опипливиот успех на производството на јајца лежи длабока филозофија – која предвидува не само просперитетен бизнис, туку и глобално движење кон хармоничен соживот со природата. Во оваа симфонија на одржливото земјоделство, „Наша фарма“ се појавува не само како снабдувач на храна, туку и како чувар на безвременската врска меѓу човекот и земјата. Аспирациите на Жарко за иднината, вклопени во претстојниот објект што ги поттикнува посетителите да го искусат животот на фармата, стојат како светилник кој ги повикува сите не само да сведочат, туку и да бидат дел од оваа органска одисеја.

Па така додека „Наша фарма“ продолжува да расте и да допира животи, жестокото верување на Жарко дека повторното поврзување со природата е мелем што го посакуваат нашите модерни животи, резонира како универзална вистина – потсетник дека во тивката прегратка на фармата, длабокото чувство на рамнотежа и благосостојба ги чека оние кои се подготвени да го послушаат неговиот повик.

Доколку сакате да нарачате и да пробате од најквалитетните јајца и производи може да ја контактирате „Наша Фарма“ (076 277 201).